கட்டழகர் கோயிலும் அதிசய நீரூற்றும்!
ஆன்மிகத்திற்கும் பாரம்பரியத்திற்கும் பெயர் பெற்ற நம் நாட்டில் உள்ள கோயில்கள், அவற்றின் கட்டடக்கலை மற்றும் சன்னிதிகளால் பல்வேறு சிறப்புகளையும் வியப்பூட்டும் அம்சங்களையும் கொண்டுள்ளன.
சிறிய கோயிலாக இருந்தாலும் சரி, புகழ்பெற்ற பெரிய கோயிலாக இருந்தாலும் சரி, ஒவ்வொரு தலத்திற்கும் தனித்துவமான சிறப்புகள் இருக்கின்றன. இத்தகைய சிறப்புமிக்க கோயில்களில் ஒன்றுதான் ஸ்ரீவில்லிபுத்தூரில் அமைந்துள்ள கட்டழகர் கோயில்.
ஸ்ரீவில்லிபுத்தூர் என்றாலே பெரும்பாலானோருக்கு முதலில் நினைவுக்கு வருவது ஆண்டாள் கோயில்தான். ஆனால், அந்தப் பகுதியில் இருந்து சில கிலோமீட்டர் தொலைவில் இயற்கை எழில் சூழ்ந்த சிறிய குன்றின் மீது கட்டழகர் கோயில் அமைந்துள்ளது. மலை உச்சியில் அமைந்திருப்பதால், இத்தலம் மலைக்கோயில் என்றும் அழைக்கப்படுகிறது.
இங்கு சுந்தரவல்லி, சௌந்தரவல்லி தாயார்கள் சமேத சுந்தரராசப் பெருமாள் பக்தர்களுக்கு அருள்பாலிக்கிறார்.
247 படிக்கட்டுகளைக் கடந்து பெருமாள் தரிசனம்!
இந்த மலைக்கோயிலில் வீற்றிருக்கும் பெருமாளைத் தரிசிக்க வேண்டுமென்றால், படிக்கட்டுகள் வழியாக மலை மீது ஏறிச் செல்ல வேண்டும். அதிகமான படிக்கட்டுகள் இருப்பதை நினைத்துக் கவலைப்பட வேண்டியதில்லை. எம்பெருமானின் திருநாமத்தை உச்சரித்தபடியே 247 படிக்கட்டுகளைக் கடந்து பெருமாளைத் தரிசிக்கலாம்.
நாவல் மரப் பொந்தில் தோன்றும் அதிசய நீரூற்று!
கட்டழகர் கோயிலின் மற்றொரு சிறப்பம்சம், மலையில் அமைந்துள்ள தீர்த்தமாகும். இது சிலம்பு ஊற்று என்று அழைக்கப்படுகிறது. தனித்துவமான அமைப்பைக் கொண்ட இந்த நீரூற்று, இத்தலத்தின் விசேஷங்களில் ஒன்றாக விளங்குகிறது.
நாவல் மரத்தின் பொந்திலிருந்து இந்த நீரூற்று உருவாகிறது. மேலும், அதிலிருந்து வெளியேறும் நீர் கீழ்நோக்கிச் செல்லும் வகையில் அமைந்துள்ளது. இதன் தனித்துவமான அமைப்பு பக்தர்களிடையே ஆச்சரியத்தை ஏற்படுத்துகிறது.
மலை மீது பெருமாளின் பள்ளிகொண்ட திருக்கோலக் காட்சி!
கட்டழகர் கோயிலில் பெருமாளைத் தரிசித்துவிட்டு மலையை நோக்கிப் பார்த்தால், பெருமாள் பள்ளிகொண்டிருப்பதைப் போன்ற காட்சியைக் காணலாம். இயற்கை எழில் சூழ்ந்த இந்த இடம் பக்தர்களுக்கு மனநிறைவை அளிக்கிறது.
எனவே, ஸ்ரீவில்லிபுத்தூர் ஆண்டாள் கோயிலுக்குச் செல்லும்போது, அருகில் அமைந்துள்ள கட்டழகர் கோயிலுக்கும் சென்று சுந்தரராசப் பெருமாளைத் தரிசிக்க மறக்காதீர்கள்.
பெருமாளைத் தரிசித்து, மனதில் உள்ள வேண்டுதல்களை அவரிடம் சமர்ப்பிக்கும்போது கிடைக்கும் மனநிறைவே தனி. எம்பெருமானே, என்னை ஆள்பவனே என்று மனமுருகி வழிபடுவோம்!
Author
pengal
Previous Post